مسلسلات رمضان.. الابراج هي المؤلف

لأن في بنات كتير بتحب تصنف الناس حسب نوع برجهم، وبيقدروا يعرفوا صفتهم المميزة ليهم وعيوبهم، لهلوبة فكرت في الشخصيات الدرامية لرمضان السنة دي وعرفت السر ورا خلافاتهم أو انسجامهم من مواصفاتهم اللي بتنتمي لأبراج مختلفة.

ولو عايزة تعرفي ابراج الشخصيات دي والنتيجة لاجتماعهم كملي قارءة. 

- مسلسل 30 يوم:

شخصياته هي " طارق – تغريد – صافي "

طارق "آسر ياسين" :

بالنظر لشخصيته ممكن نقول انه برج "الثور" لأنه بيحب عيلته وبيحميها جدا، وبيبقى في اقوى حالاته لما يمر بظروف صعبة وفي نفس الوقت هو عنيد علشان كده لاحظنا رفضه لكل محاولات الاستسلام في المسلسل او الاعتراف بالغلط.

برج الثور كمان بيحب المشاريع والفلوس وده اللي دفع طارق يعمل مشروع مع أصحابه.

تغريد "إنجي المقدم" :

تعتبر برج الجدي لأن الستات فيه صبورة وبتستحمل الظروف الصعبة وبتساند شريكها جدا وعندها حس أمومة عالي، وجريئة في المواجهات زي ما واجهت زوجة طارق التانية "صافي" وكمان "توفيق" اللي بيهددها بالقتل.

الست الجدي بتهتم بالعيلة وتقاليدها علشان كده علاقة تغريد بأهل جوزها كانت قوية وكويسة جدا.

صافي "نجلاء بدر" :

باللي شوفناه منها نقدر نقول انها برج الجوزاء، لأنها بتكره القيود وبتحب التنوع والشهرة وتحب تبقى محط الأنظار، وكمان غير صبورة في المواقف الصعبة وبتفقد أعصابها بسرعة.

ومن خلال ده نقدر نعرف ان علاقة برج الثور "طارق"، ببرج الجدي "تغريد"، بتتميز بالتوافق والارتياح في التعامل وبيلاقوا في بعض سكن واستقرار وتفاهم بشكل أقوى من علاقة الثور "طارق"، والجوزاء "تغريد"، لأن البرجين دول بينجذبوا لبعض لكن التفاهم بينهم ضعيف جدا لأن تصرفات البرج التاني بالنسبة للاول غير عقلانية ولا مقبولة. 

- مسلسل هذا المساء:

عندنا في المسلسل أكتر من علاقة متشابكة شخصياتهم هم " أكرم – نائلة – عبلة – سمير – تقى"

أكرم "إياد نصار" :

برج "عذراء" بجدارة لأنه منظم وبيرتب ورقه أول بأول، متفوق في شغله، واثق في نفسه ومع كده متواضع ولطيف مع الناس، لكن صعب عليه يعترف بغلطه أو تقصيره.

كمان بيهتم بالعلاقات وبيحبها تبقى طويلة مش بيدخل علاقة للتسلية وده اللي صعب الانفصال بين أكرم وعبلة أو نائلة لأنه بيحب يحتفظ بعلاقاته، وعنده جزء من الأنانية وحب رضا النفس.

عبلة "حنان مطاوع" :

برج القوس لأنها قوية وشجاعة وبتعرف تتصرف في المواقف الصعبة زي لما خبت وجود اكرم في بيتها، كمان متمسكة جدًا بالشرف والاخلاق، وفي نفس الوقت مرحة وبتحب الدلع.

نائلة "أروى جودة" :

برج العقرب، لأنها بتعرف كويس جدا تخطط وتدبر في هدوء، انفعالاتها داخلية أكتر من انها يبان عليها، وبتعرف كويس جدا تدي انطباع للي قدامها انها بخير حتى لو بتتكسر من جواها، قوتها في مشاعرها اللي بتبقى زي البركان لما حد يستفزها وده اللي حصل معاها لما عرفت ان جوزها اتجوز عليها من وراها.

ونلاحظ اننا وصلنا للنهايات طبيعية، لأن علاقة الراجل العذراء "أكرم" مع الست العقرب "نائلة" انه بينجذب لقوتها بس بيخاف منها أحيانا، لكنه ممكن يقلب فجأة لو حس ان العلاقة ينقصها الصراحة.

أما علاقة العذراء"أكرم" بالقوس "عبلة"، مشكلتها ان الاول ساعات بيكره تمسك التاني بحاجات معينة زي اصرار عبلة على وجود الطفل، وده اللي فسد العلاقة.

سمير "أحمد داوود" :

شخص طيب وهادي ومتسامح وحنين ودي مواصفات برج الحوت، كمان بيميل للوحدة أكتر من التجمعات وشخصيته قوية يعتمد عليها مع انه مسالم وبيكره المشاكل.

تقى "أسماء أبو اليزيد" :

مواصفات تقى مناسبة جدا للبنت السرطان الحساسة اللي بتعبر عن مشاعرها بتعبيرات وجهها وساكتة معظم الوقت حتى في فترات الحزن والانكسار، ورغم انها متقلبة عاطفيا إلا انها محبوبة.

والتوافق بين الحوت والسرطان كبير لانهم بينسجموا مع بعض وبيلاقوا الحماية عند بعض وبيجمع بينهم الحنية والعطف والاحلام والوردية. 

- مسلسل حلاوة الدنيا:

لو بصينا على العلاقات الرئيسية في المسلسل بين "أمينة – سليم – عليا – حسن" هنعرف ابراجهم من شخصياتهم ونعرف طبيعة اللي وصلوا له.

أمينة "هند صبري" :

برج القوس لأنها متفائلة وبتحب الحياة وعندها أمل في بكرة طول الوقت وقوية في قراراتها، كمان شخصية محبوبة وخالية من العقد، كمان كانت لاغية كلمة مستحيل من قاموسها.

سليم "ظافر العابدين" :

برج الحمل  لأنه واثق في نفسه، مندفع لما بيوصل لقرار، بيحب الجنان والانطلاق وده كله شوفناه في علاقة سليم بأمينة.

وعلاقة القوس بالحمل مثالية وحلوة جدا، لان الاتنين ابراج نارية وبيشجعوا بعض على الحياة والانطلاق وبيوصلوا لأهدافهم مع بعض، وعلاقة الحب بينهم أقرب للصداقة من الحب.

عليا "سلمى أبو ضيف" :

برج الدلو شخصية قوية ومتمردة على التقاليد وبتحب تجربة كل ما هو جديد، مفيش حاجة قدرتتغيرها وتطوعها غير الحب اللي عمل منها شخصية بتسمع الكلام وبتسامح وتعدي، لكن في وقت ما التنازلات بقت أكتر من تحملها بعدت لأن الدلو بيحب نفسه وبيخاف عليها وبيكره أي قيود في حياته حتى لو كان علاقة عاطفية ضاغطة عليه. 

حسن "أحمد حاتم" :

برج الأسد معتز بنفسه جدا وشايف انه أحسن من كل اللي حواليه، مستبد وردوده قاسية واحكامه على الناس متسلطة، كمان بيهتم بشكله ومتكبر وشرس أحيانا كتير في ردود أفعاله وده اللي شوفناه لما ضربها اكتر من مرة.

العلاقة بين الاسد والدلو علاقة انجذاب متبادل هو بيحب فيها انها بتكمل مظهره الجميل بشخصيتها المنطلقة اللي بتحب الحياة، وهي بتحب فيه سلطته وغروره، علشان كده ممكن تسامحه وتعدي له، لكن العلاقة بيبقى فيها صدامات كتير، علشان كده بنلاقي انهم انفصلوا في الآخر. 

- مسلسل لا تطفئ الشمس:

العلاقات كتير جدا في المسلسل والشخصيات متنوعة، واهمهم "أحمد – إنجي – فيفي – آدم – رشا – يوسف"

أحمد "محمد ممدوح" :

المتحفظ الملتزم اللي ابداعه وانتاجه بيبان لما بيقى تحت ضغط علشان كده بيمثل برج الجدي، لانه بيهتم بعائلته وبتبقى في المرتبة الأولى عنده، وبعدها يجي أي حد، ممكن يكون بيحب شخص جدا لكن بشكل الوصاية او السيطرة، حبه ممكن يخنق شوية لان فيه تسلط نابع عن خوف، وتعبيره عن المشاعر بييجي بعد خسارة اللي بيحبه، كمان مهتم بتفاصيل اللي بيحبهم جدا وده لاحظناه لما اتكلم عن اخوه آدم وقال هو بيحب ايه وبيكره ايه.

إنجي "امينة خليل" :
برج الدلو لانها عارفة كويس مين أقرب ناس ليها ومين لا يستحق حبها، وبتحب نفسها قبل الكل، ودي طبيعة في البرج ده، كمان سهل جدا تبعد عن الناس اللي بتستغلها.

فيفي "ريهام عبد الغفور" :

برج الجدي لأنها طموحة ومتحفظة جدا، مش راضية باللي عندها وعايزة اكتر منه لأنها شايفة انها تستحق اكتر، وناقدة جدا لكل اللي حواليها.

آدم "أحمد مالك":

برج الحمل لان عنده أفكار مختلفة وحماسية وبيكره القيود ومتسرع في ردود افعاله، ودايما شايف نفسه صح.

رشا "شيرين رضا" :

الست اللي بتكره الحب لأنه نكد وقيود، طبعا لازم تبقى برج الجوزاء لانها صاحبة الكل ومنطلقة وبتحب الحياة وبتكره القيود حتى لو في الحب أو غيره وصريحة وبتحب المواجهات.

يوسف "احمد مجدي" :

برج العذراء لأنه عايز يوصل بأي طريقة، وفعلا بيوصل لهدفه اللي خطط له، بيخلي مصلحته قبل أي شيءن لكن رغم عمليته دي هو برج عاطفي والحب مهم في حياته وبيتجرح منه. 

ومن الأبراج دي نستنتج  علاقة الاخوات ببعض "أحمد - فيفي- آدم - إنجي"  إن دايما الجدي والدلو مش بيفهموا انطلاق الحمل وحماسه وبيعتبروه تهور وعدم نضج، أما علاقة الدلو بالجدي فدايما بتبقى علاقة قط وفار لأن الجدي بيحاول يسيطر على كل اللي حواليه وعايز يمشيهم حسب الأصول اللي هو مؤمن بيها.
ونهاية العلاقة مثلا بين يوسف وإنجي بتقول ان لازم الدلو يهرب بنفسه من استغلال العذراء، أما في علاقة فيفي كان لازم ترفض ارتباطها بالدكتور سعد لأنها شايفة خطيبها أقل من اللي تستحقه، لكن بعد فترة بتستخسر حاجة تضيع منها فرجعت له.