والد حلا شيحة يرد على هجومها على تامر حسني وفيلم "مش أنا": مش بنتي اللي أعرفها وهي كانت معجبة جدًا بالفيلم!
بعدما هاجمت الفنانة حلا شيحة فيلم "مش أنا" وتبرؤها من مشاهدها فيه، بعد طرح كليب "بحبك" مع تامر حسني، الذي يحمل مشاهد متفرقة من الفيلم، خرج الفنان التشكيلي الكبير أحمد شيحة، والد حلا، في تصريحات صحفية، مبديًا دهشته من تصريحاتها الأخيرة، بكلمات حملت بعض الهجوم أيضًا.
حيث رد الفنان التشكيلي أحمد شيحة، على هجوم ابنته حلا على فيلم "مش أنا" والنجم تامر حسني، قائلًا: "كلام مايصحش، هي صورت الفيلم وكانت معجبة بيه جدًا، والكلام ده ماعرفش أساسه إيه، أنت صورتي وخلاص.. مش دي حلا اللى أنا أعرفها".
وأضاف والد حلا: "كانت عاتبت تامر حسني فى التليفون، أنا حضرت أول يوم تصوير معاهم وكان فرحان بينا جدًا".
وتابع والد حلا مباركًا لتامر على نجاح الفيلم: "أقول لتامر مبروك، الفيلم ناجح جدًا نتيجة لمجهود اتعمل، وبهنئ الناس اللي اشتغلت فى الفيلم، والحمد لله الفيلم حقق إيرادات غير مسبوقة".
واختتم الفنان التشكيلي أحمد شيحة حديثه قائلًا: "غير موافق على كلام حلا على الإطلاق وماينفعش الكلام ده، ومش عشان خاطر هي بنتي هطاوعها في الغلط".
راندا البحيري تهاجم حلا شيحة بعنف عريس وطرحة ومن تاني يوم تقول مين هيدخل الجنة ومين لا!
وكانت حلا شيحة قد وجهت رسالة لصناع كليب فيلم "مش أنا"، عبر حسابها الشخصي على "إنستجرام"، قائلة: "أنا اتفاجئت جدًا بنزول كليب يجمع فيه مشاهد متفرقة من الفيلم، وفي أيام ذي الحجة أيام مباركة، وخصوصًا بعد أخر بوست نزلته ووضحت فيه أنا إيه..، واتفاجئت أكتر خصوصًا بعد وعد تامر حسني ليا وتأكيده إنه هيحترم رغبتي وبعض الطلبات اللي طلبتها منه بكل احترام وود الصيف اللي فات، وأكدلي إنه هيحترم رغبتي، إحنا يمكن نجحنا بمقايس الدنيا بس صدقوني بمقايس ربنا احنا لم ولن ننجح".
وأضافت: "أنا عارفة ومتأكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح، بتكلم من قلبي الكليب ده ميرضيش ربنا وأنا عيطت لإني شفت نفسي في المشاهد دي، دي كانت زلة نتيجة ظروف مريت بيها وكلنا بنغلط ولازم نغلط علشان احنا بشر، بس المصيبة إننا بنغفل وبننسى".
وتابعت حلا: "أنا مش هتكسف من حد أنا تبت من المشاهد دي وهي لا تصح وأنا غلطت وبصلح وأهم حاجة إن ربنا يرضى عني، لأن في الأخر ده اللي هينفعنا مش الشهرة ولا النجاح، لا هو مش نجاح أصلًا، علشان النجاح الحقيقي حاجة تانية خالص، احنا أغلبنا ناسيها إلا القليلين منا".
وأكملت حلا: "الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن، احنا كلنا عندنا امتحان في الدنيا دي وحابة أفكرك بالفيديو ده يا تامر اللي قولت فيه أنا مش بتمنى أموت وأنا مطرب أنا دايما خايف من كده، كلام أكيد قولته في لحظة صدق جواك وجوانا كلنا، شوفه تاني يمكن يفكرك إن جواك أكيد في صراع وأنا وكلنا".
واختتمت كلامها: "كلنا بنغلط بس المهم في الأخر نتدارك الغلط ونصلح، {إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله، يا سلام لو أصواتنا ومواهبنا كلها نستعملها في الخير عشان يبقى فن بجد".
يذكر أن فيلم "مش أنا" كان يمثل عودة لحلا شيحة للسينما بعد قرار عودتها عن قرار الاعتزال، فكان أخر فيلم سينمائي شاركت فيه هو "كامل الأوصاف" الذي عرض عام 2006، من بطولة عامر منيب، وحلا شيحة، وعلا غانم، ومن تأليف أحمد البيه، وإخراج أحمد البدري.
موضوعات متعلقة:
شاهد أحدث ظهور لحلا شيحة بالحجاب
راندا البحيري تهاجم حلا شيحة بعنف عريس وطرحة ومن تاني يوم تقول مين هيدخل الجنة ومين لا!
هجوم شديد على حلا شيحة بعد رسالتها للفنان تامر حسني ما الحكاية؟