شريف مدكور يتحدث عن التربية الصحيحة وكيفية الحصول على وزن مثالي والمشكلة الأساسية بين الرجل والمرأة

استكمالًا لحديث "لهلوبة" مع الإعلامي المشهور، شريف مدكور، الذي تميز بتقديم البرامج التي تهم المرأة والطفل والأسرة، تحدث عن كل ما يهم الرشاقة والجسم المثالي، ونظرته عن السيدة اللهلوبة، كما تحدث عن العلاقات بين الرجل والمرأة وطريقة التربية وطريقة تعامل أولياء الأمور الخاطئ مع الأطفال، ولم يغفل الحديث عن الديكور وشكل البيوت المصرية، وكل هذا وأكثر سيكشفه لنا شريف مدكور في حواره مع "لهلوبة".

من هي أكثر سيدة لهلوبة في حياتك؟

- أمي لهلوبة، وكل ستات عيلتنا لهلوبة بس لما الناس تشوفهم مش هيقولوا عليهم كده خالص علشان شكلهم شيك ومحنتفين وحاطين ميكياج، بس هما كلهم عرفوا يحفظوا على بيوتهم وعرفوا يربوا عيلهم، ومحدش في عيلتنا أطلق إطلاقًا، فالست اللي تحافظ على جوزها وعيالها وتخلي جوزها يحبها وولادها يفضلوا مرتبطين بيها، دي الست اللهلوبة من وجهة نظري.

هل تُفضل التماشي مع الموضة في اختيار أثاث المنزل؟

- المنزل هو المكان اللي بقضي فيه وقت كبير أوي من حياتي، فلازم كل حاجة في البيت بتاعي تبقى مريحة ليا أنا مش للآخرين، من أول الألوان لازم تبقى الألوان اللي أنا بحبها، مفيش حاجة أسمها الألوان دي موضة والألوان دي مش موضة أو دي بتضيق ودي بتوسع، علشان كده مفيش موضة للبيت، في شخصية لكل بيت، بس إحنا في مصر أغلبية البيوت ملهاش شخصية للأسف، أحنا فقدنا هوية المنزل المصري من 70 أو 80 سنة، علشان بقت الناس بتمشي على الموضة فبقت كل حقبة في موضة للبيوت المصرية غير متناسبة مع المصريين أصلًا، يعني أنا في بيتي أكتر حاجة تزعجني إني أحط في أوضة النوم تليفزيون أو أي جهاز، أوضة النوم للنوم، بيزعجني إن ممكن ناس يفطروا أو يأكلوا عيالهم على السرير، لأنهم من الأول ما أسسوش البيت بالطريقة السليمة اللي هتخليهم يعرفوا يعيشوا عيشة مرتاحة.

هل بتساعد في شغل البيت؟

- آه في حاجات بساعد فيها، بس أنا مبعرفش أطبخ لكن بعرف أسخن، وكمان أنا بحب أغسل هدومي بنفسي لأن أنا شخص مش بيشتري هدوم كتير، بشتري هدوم قليلة أوي، ويوم ما بشتري هدوم بدفع فيها فلوس كتيرة أوي، فبحب أحافظ عليها، يعني البلوفر اللي أنا لابسه ده بقاله 8 أو 9 سنين، وعلشان يفضل كده لازم أنا اللي اغسله وابقى عارف إنه هيتغسل بمايه ساقعة، وهيتنشر بطريقة معينة علشان مايمطش، أو يبوظ، وكمان كوي الهدوم كتير بيضعف خيوطها.

كيف تحافظ على ملابسك لأطول فترة ممكنة؟

- الهدوم مش المفروض تتغسل كتير، مش المفروض تتنشر في الشمس، مش المفروض تتنشر على شماعة، المفروض تتطبق وتتشال بطريقة معينة، يعني لما بخلص الشتاء بشيل البلوفرات دي بطريقة معينة، بحيث يكون في ورقة زبدة بين طبقات البلوفر، وعلشان كده الهدوم بتعيش عشرات السنين، أنا عندي بلوفر طلعت بيه على الهوا قريب كنت جايبه سنة 89 وأنا في المدرسة.

ما رأيك في تصنيف البنات حسب شكلها؟

- أنا عمري ما حبيت البنت الرفيعة أوي اللي عضم على لحم وما بحبش برده كلمة كيرفي، مش المفروض البنت يتقال عليها كده ده عيب، وإزاي البنات تقبل إن يتقال عليها كده، أصل البنت مش سلعة علشان أقول عليها كيرفي مايصحش، والبنت مش بجسمها ولا بشكلها، ولا الراجل كمان لأن الشكل ده هيروح، واسم المصطلح كيرفي أصلًا بايخ.

ما هي أفضل رياضة مناسبة للسيدات؟

- الرقص البلدي ده رياضة، مافيش أي مشكلة لما الست ترقص في البيت وفي المطبخ، أولًا بيطلع الطاقة السلبية في الجسم ومحدش شايفها وهي بتتبسط وهتعمل الأكل بحب.

كيف تحافظ على جسم مثالي؟

- الموضوع سهل جدًا إن يبقى عندنا مواعيد للأكل، يعني بنفطر مثلًا الساعة 8 الصبح، كلي زي ما أنتي عايزة حتى لو هتاكلي خروف، بس تقعدي لغاية الساعة 12 مثلًا ممكن تاكلي خيارة أو جزرة أو كام ورقة خص أو تفاحة، وتعالي بقى الساعة 3 اتغدي وكلي اللي انتي عايزاه، وعلى الساعة 5 ممكن تاكلي مع الشاي كده بسكوتة بس مش باكوا بسكويت، تعالي بقى على الساعة 8 ونص أو 9 اتعشي اللي أنتي عايزاه، بس ما تناميش غير بعدها بـ 3 ساعات، عمرك ما هتتخني، وكده عمر ما حد هيتخن أصلًا، ما أنا أهو عندي 45 سنة وباكل أكل فظيع وعندنا في البيت كلنا بناكل، بس بناكل في مواعيد محددة.

ما هي المشكلة الأساسية في علاقة الرجل بالمرأة؟

- الأنوثة اللي في المرأة بتحتم عليها إن يبقى معاها راجل تحبه ويدلعها ويقولها كلام حلو، هتبقى كويسة أوي معاه، لكن المشكلة اللي حصلت عندنا إن إحنا في مجتمع ذكوري حصله صدمة ثقافية بقاله 40 سنة، من ساعة الانفتاح سنة 75، بعد الصدمة الثقافية دي اللي حصل إن الستات الأمهات بقت تدلع الولد، وده كان الأول موجود أكتر في الصعيد، بقى موجود في كله، الأم عايزة تدلع الواد وتتباهي وتتفاخر بيه، فتيجي على نفسها وتدخله مدرسة غالية، وتقول لأخته اعملي لأخوكي كذا وكذا، يكبر بقى الواد شوية يسقط في المدرسة تخبي على أبوه وتمضي هي علشان أبوه مايزعقلوش والولد مايتعقدش، بعدين يكبر يبقى شحط في الجامعة، يدخل على أمه وهي تعبانة ماما سخنيلي، ماما اديني مش عارف إيه، عايز أروح الجيم، ماما أنا صاحبت واحدة اديني فلوس اجبلها هدية في الفلانتين، وماما بتديله ما بتقولش لا انشالله تبيع حتتين الصيغة بتاعتها علشان تجبله اللي هو عايزه، وبتقول للبنت لا، ده اللي أدى إلى إن الطلاق بقى كتير أوي في مصر.

ما هو السبب وراء زيادة حالات الطلاق؟

- العيب في الراجل مش الست، مفيش ست عايزة تخرب بيتها ومفيش ست عايزة تبقى مطلقة، فالمشكلة عندنا في الراجل المصري.

أكبر غلطة يرتكبها الرجل في حق المرأة؟

- أنا عندي مشكلة مع الرجالة في مصر، أغلبيتهم عندهم شيزوفرينيا.. يقولك أصل دي أمي أصل دي مراتي.. لكن دي بقى صاحبتي، يا حبايبي طب ما نراعي ربنا طيب، أهما حاجة لازم الراجل يحترم الست وهي تحترمه.

الحل الجذري لمشكلة التحرش من وجهة نظرك؟

- مش إحنا عندنا إحصائية إن مصر رقم واحد في العالم اللي الست والبنت مش بيعرفوا يمشوا بأمان في الشارع وإن احنا الدولة رقم واحد في التحرش في العالم، يبقى العيب على رجالة مصر انهم بيتحرشوا بيهم لفظيًا وجسديًا، وده معناه إن في خلل في الراجل المصري، إنه بيستبيح الست اللي ماشية في الشارع، شايف أنه من حقه يمسكها أو يلمسها فيروحوا بقى يتعالجوا، أنا نفسي يبقى عندنا عقوبة للتحرش، بعد ما يتقبض على المتحرش هاتوه، يتحطله حلقة في ودنه ماتتفكش غير بعد سنة، ولما تتفك يفضل عنده الخرم ده في ودنه دليل أنه أتحرش بواحدة، لو واحد حصل فيه كده، كل ستات مصر هيمشوا بالميكرو والقط والحملات ومحدش هيقدر يبصلهم، عيب اللي أنا بقوله بس ده اللي المفروض يحصل.

ما هو أهم عنصر للتربية الصحيحة؟

الإحترام، أنهم يحترموا كل حاجة ويحترموا ثقافة الآخر، لازم الأطفال يتعلموا يحترموا الأب والأم، وده مش هيحصل علشان كتير من البيوت المصرية الأب والأم مش فاضين، الأب والأم بيشتموا بعض، الأب والأم بيضربوا بعض، الأب والأم بيطلقوا، الأب والأم دلوقتي محتاجين تربية علشان يعرفوا يربوا العيال اللي طالعة صح.

ما هي أكثر مشكلة صادمة عُرضت عليك أثناء تقديمك للبرنامج بخصوص الأطفال والتربية؟

- سعات بيجلنا مشاكل أنا بنهار، وبيجلنا مشاكل من بعض البنات على رسائل صفحة البرنامج، زي مشكلة بنت عندها 16 سنة بعتت بتقول أهلي بيكرهوني، وبيتعاملوا معايا معاملة غير طبيعية، وعلشان تذلهم راحت صاحبت واحد وأخطأت معه علشان تذلهم وراحت قالتلهم، انتوا بتذلوني فأنا بقى هذلكم، أنا اتخضيت وقولت لا معندناش الحاجات دي في المجتمع، تاني يوم اتفاجئ بكمية رسايل فيها مواضيع زي ده بقيت مذهول.

ما هي دورك في حياة أولاد أخيك؟

- ولاد أخويا متربين تربية حلوة جدًا ولو عندي عيال كنت أحب يتربوا كده، وأنا الجزء اللي بيبوظلهم حياتهم، يعني هما ممنوع يشربوا مشروبات غازية فأنا ساعات بقولهم تشربوا يقلولي لأ ما بنشربهاش، وكمان ممنوعين يقعدوا في العربية من الكرسي من قدام، فبقول لابن أخويا ساعات أقعد جمبي قدام يقولي لأ ممنوع أقعد قدام، وده ولا مامته ولا باباه شيفينه.

ما هو أكثر شئ تفتخر به في تربيتك؟

- أمي عمرها ما كانت بتزعق، وأمي وأبويا كانوا بيشركوا في التربية سوى وهما كانوا منفتحين جدًا ومكنوش بيقولولنا أقعدوا ذكروا أو يجبرونا على حاجة، ولما كنا بنغلط مش بيزعقوا بالعكس بيسبونا نجرب ونغلط علشان نتعلم.

هل أنت خايف من مسئولية الأبوة؟

- أنا مش عجبني المجتمع اللي عايشين فيه كلنا، عجبني المجتمع إللي أنا عايش فيه، لأني عايش في مجتمع غير اللي أنتوا عايشين فيه، أنا عايش في مجتمع حلو جدًا ومتلمع كده، بس براه في مصر كلها في كذا مجتمع وكلهم مش لايقين على بعض ومش بيعرفوا يتعملوا مع بعض، فأنا مش عايز أجيب أطفال يتربوا في مجتمع عنصري وبرده مش عايز أعيشهم في قوقعة زي ما أنا عايش.

 

موضوعات متعلقة:

شريف مدكور: "أنا شايف أني شخص لهلوب والرجالة اللي ما بتساعدش في شغل البيت فرافير"

شريف مدكور يتحدث عن أخطاء التربية و يروي قصة فتاة انتقمت من أهلها بطريقة صادمة

شريف مدكور: طريقة تربية الأمهات للأبناء الذكور سببًا رئيسيًا لكثرة حالات الطلاق