ممثل "فرصة تانية" يكشف عن سوء حالته الصحية: بسيب باب الشقة موارب علشان مش قادر افتح لحد
بواسطه روضة إبراهيم الأربعاء , 19 أغسطس 2020 ,1:41 م
.png)
كشف الفنان الشاب كريم سرور، الذي شارك في مسلسل "فرصة تانية" مع الفنانة ياسمين صبري، عن تعرضه لوعكة صحية شديدة جدًا خلال الأيام الماضية، حتى بات غير قادر على النهوض من مكانه.
وأوضح "كريم" أنه على الرغم من أنه يعيش بمفرده في ظل مرضه الشديد إلا أنه لم يسأل عليه أحد من المقربين، وأنه يضطر أن يترك باب بيته مفتوحًا لأنه لن يقدر على النهوض لفتحه لأحد ممن يوصلون الطلبات له.
وكتب الفنان الشاب كريم سرور عبر حسابه الشخصي على موقع التواصل الاجتماعي "فيس بوك"، موضحًا سوء حالته الصحية التي وصل إليها نتيجة إصابته بتقرحات في المعدة، قائلًا: "أنا كدة بقالي ٤ أيام حرفيًا مش قادر اتحرك ولو روحت الحمام دي تبقى معجزة من عند ربنا، وموارب باب الشقة عشان الديليفري بتاع الصيدلية أو المطعم لما ييجي يدخل علطول عشان مش هقدر بجد أقوم افتح الباب".
وتابع كريم: "المهم إني نزلت ستوري لعلاجي الكتير والحقن اللي باخدها وكتبت إني تعبان جداً ومعظم أصحابي عارفين إني عايش لوحدي، الكوميديا كلها بقى إنه جالي ٣ مكالمات بالظبط من ناس هما آه أصحابي طبعاً لكن مش قريبين وبنتقابل كل فترة كبيرة، وكام مسدج كده من نوعية مالك يا بني فيه إيه ومش هنحسب الريبلايز بتاعة الستوري عشان ده هنعتبره مجرد كومنت كده وأنا مش هحسب الكومنتات إنها اهتمام أكيد".
وأضاف: "طب ليه أنا بكتب الكلام ده، لإني فاكر كويس إن فيه فترات كنت شغال كتير ومنتشر والناس ساعتها كلها كانوا مهتمين أوي بيا، فخر الشلة بقى ومع الوقت بتحصل تموجات وعلو وهبوط، اللي مضايقني جداً جداً إن من ضمن ٣٤٠٠ شخص شافوا الاستوري يجيلي ٣ مكالمات ومش ناس قريبة أصلاً، اللي هو فكرة إن حتى القريبين منك هيحبوك على أساس نشاطك الحالي مش لشخصك".
وأوضح سبب سوء حالته الصحية، قائلًا: "الحالة دي عمومًا بتجيلي كتير بسبب تقرحات في المعدة وبتضرب القولون كمان وباخد حوالي 5 أيام بدون حركة تمامًا لحد ما تستقر شوية الامعاء وابدأ اتحرك، لأنه أي حركة بجد بتكون مؤلمة جدًا كأنك بتقطع في جسمك وأحشائك من جوه وبيكون ألم رهيب لدرجة ممكن تسمع صوت صرختي لو أنت حد من جيراني الاعزاء وعلى بعد 5 عمارات مثلًا".
واختتم كريم حديثه: "أنا بقول الكلام ده وأنا صاحي بقالي ساعتين بحاول أقوم أدخل المطبخ أسخن شوربة الخضار وأجيب مياه عشان العلاج ومش قادر وحرارتي مرتفعة بشكل كبير فالموضوع أشبه بالتخريف، بس حسيت إني معنديش قدرة على المقاومة فعلاً وحبيت أفضفض شوية، لو نكدت عليكم حقكم عليا ولو مش فارق معاكم فده كان شيء متوقع من الأول، وأنا بالكتير بكرة أو بعده هكون كويس جداً وهستعيد نشاطي وحيويتي بكل سهولة".
والجدير بالذكر، أن أخر عمل فني شارك فيه كان مسلسل "فرصة تانية" في موسم رمضان الماضي، مع الفنانة ياسمين صبري، وأحمد مجدي، وهبة مجدي، ومن إخراج مرقس عادل.
