ابرز تصريحات شيرين رضا عن الرجال والحرية
بواسطه إسراء صادق الخميس , 19 أكتوبر 2017 ,9:21 ص
.png)
الفنانة شيرين رضا أصبحت مؤخرًا أيقونة للجمال، بس في الحقيقة مش في الشكل ده كمان في الفكر والروح وأسلوب الحياة، وده جعل كتير من الناس متابعين لاخبارها وبيهتموا يعرفوا آرائها في موضوعات مختلفة، أما الستات تحديدًا بقت بتهتم تعرف وصفاتها وأسرار جمالها ورشاقتها رغم اقترابها من سن الخمسين.
وعلشان كده لهلوبة، جمعتلك ابرز آراء وتصريحات قالتهم الفنانة شيرين رضا في آخر لقائتها التليفزيونية ببرنامج "هنا العاصمة":
1- علقت "شيرين"على الاعتداء مرة أخرى على سُمية المعروفة بـ"فتاة المول" قائلة: " أنا آسفة.. آسفة ليكي ولكل حد شاف الصورة دي.. آسفة ان في واحد متحرش اتسجن أسبوعين بس وطلع بعد ما دفع غرامة 100 جنيه وخرج عشان يوصلها انها تبقى مرمية في مستشفى وعندها جرح زي ده هيفضل طول عمره في وشها".
2- بنتي كان نفسها في ثعبان فجبتهولها وبعدين قالتلي مش عايزاه فأخدته أنا حطيته في البانيو، بحبه أوي هو مش سام وكان بيلف على ايدي الناس تفتكره غويشة لحد ما يتحرك، بالإضافة إلى أن عندي 24 قطة، بالإضافة لكلب"
3- وعن أحمد الفيشاوي، قالت، عايزاه يركز شوية وميبقاش صاحب بالين علشان هو ممثل شاطر جدًا، وعن اللي قاله في مهرجان الجونة علقت: "هو مقالش حاجة غريبة عننا كلنا مابنقولهاش آه غير لائقة كفنان وللمكان بس مينفعش ان احنا كلنا نسن سكاكينا عليه".
4- بنتي أكتر حاجة بتسعدني، آه وحشاني لكن مش زعلانة علشان بتدرس بره، علشان أنا مش أنانية مادام ده الأحسن ليها ولدراستها.
5- "لو أنا مسئولة السعادة هنضف للناس الشوارع، وهخلي القاهرة دي طريق واحد اللي يروح ميرجعش عشان مايبقاش عندنا زحمة، هحط شجر أكتر وجناين علشان أحنا بقينا عايشين في مدينة كلها بنايات والتلوث اللي فيها مخلينا تعساء".
6- أنا مش صورة ولا عروسة أنا بني آدمة وليا آرائي اللي بيأيدها البعض وبيرفضها البعض، مبقلقش من رفض الجمهور لبعض الآراء الجريئة، الشعب ده بيحب الجرأة ده حتى بيسأل الفيلم ده قصة ولا مناظر، بس يحب يتفرج عليكي انتي وانتي عاملة المناظر لكن أخته ومامته ومراته لأ.
7- أنا وعمرو دياب كنا صغيرين جدا لما اتجوزنا ومتفقناش، اطلقنا بس فضلنا أصحاب كويسين، ليه الناس بتستغرب، أولا احنا بينا بنت وكنا متجوزين يعني بينا عشرة معقولة بعد ما نطلق نتعامل كأننا مانعرفش بعض.
8- الناس بتبص للطلاق زي ما الست بتقول "انت أخدت أحلى سنين من عمري"، لأ أنا محدش أخد مني حاجة أنا كنت مبسوطة، بس أنا كبني آدمة أنا حرة لو محطوطة في موقف مش عاجبني إني أطلع منه في أي وقت.
9- مواصفات الراجل اللي ممكن يعجبني أولا يكون عنده ثقة في نفسه، جنتل مان، معندهوش الفكر العقيم بتاع الرجالة، راجل بيحب يتبسط في الحياة علشان احنا قاعدين هنا مدة قصيرة فلازم نتبسط، مش عايزة حد ينكد عليا ولا أنا أنكد على حد.
10 -أنا مش عايزة أتجوز تاني علشان بشوف أن منظومة الجواز فاشلة، الست مش محتاجة راجل تسند عليه ولا الراجل محتاج لست، وغير كده أنا عندي رجالة كتير في حياتي غير فكرة الزوج، أبويا وأصدقائي وحتى عمرو.
موضوعات متعلقة:
خدى فكره
