نجل محمود عبد العزيز يهاجم شقيق ياسمين عبد العزيز: طب اتكلم عن واحدة منعرفهاش

تواصلت ردود الأفعال، على الأزمة التي وقعت بين النجمة ياسمين عبد العزيز وشقيقها الفنان وائل، حيث شن الفنان محمد نجل النجم الراحل محمود عبد العزيز، هجومًا لاذعًا على الأخير، بعد حديثه غير اللائق عن أخته عبر حسابه الشخصي على موقع التواصل الاجتماعي "فيسبوك"، بسبب ارتباطها بالفنان أحمد العوضي الذي يصغرها بحوالي 10 أعوام.

وخرج الفنان محمد محمود عبد العزيز، في بث مباشر له عبر حسابه الشخصي على "فيس بوك"، مهاجمًا شقيق ياسمين عبد العزيز بكلمات قوية، قائلًا: "أنا مش عارف أقول إيه، أنا طالع منفعل بحدث مش مصدقه ولا فاهمه وقاعد فاتح الكلام قدامي ومش مصدق إن فيه ناس بتعمل كده، وفيه إخوات بتفكر بالطريقة دي، وبقى فيه هبل بيحصل، وأنا مش داخل أعاتب شخص بعينه لأنه مش من حقي، لكن بما إن الموضوع تحول إننا بنفضح بعض وإننا إخوات في بعض وبنتكلم على بعض وبنقول أي كلام في أي كلام والسوشيال ميديا مدمرة دماغنا لهذا الحد".

وتابع: "اللي بيحصل ده مالوش أي علاقة بحاجة اسمها رجولة أو أخوة أو تربية، وده خرج برة نطاق المنطق تمامًا وأنا مش مقتنع ولا مصدق تمامًا".

وأضاف: "أنا فاكر إن أهالينا لما ربونا علمونا اننا نتلم مع بعض بس ده للي اتربي يعني، وانا بتكلم على الأهل اللي ربت والعيال اللي اتربت من أهلها، إننا نحابي على بعض ونحل مشاكلنا جوة بعض ومنصغرش بعض قدام الناس واللي مالوش كبير بيشتري له كبير".

واستكمل حديثه مُنفعلًا: "لو أنا وأخويا اتخانقنا لا قدر الله هروح له نتصافي مش هكلمه عشان نتخانق واكتب على السوشيال ميديا، وإيه كمية الكلام المكتوب أنا مش فاهم، الأخ اللي دخل كتب كده على أخته دماغه مبتفكرش وكتب أول سطر عادي كان مختل ومش مركز".

ووجه سؤال لشقيق ياسمين عبد العزيز، قائلًا: "مفكرتش أنت بتكتب ايه.. ده لو واحد مصاحب واحدة وسابها ميجرؤش أنه يقول عليها حاجة أو يكتب عليها حاجة، لأن الموضوع مستفز جدًا بصراحة، واللي حصل بأكد أنه مالوش دعوة بالرجولة خالص".

وتابع: "طب اتكلم عن واحدة منعرفهاش ومش معروف أنها بألف راجل وجدعة مع أصحابها وانا مش باعتبك ولا بلومك بس انت مش صح والموضوع بقى كتير قوي قوي، وحسبي الله ونعم الوكيل في الجنان اللي حصل وخلاص.. الرصاصة طلعت ورشقت في قلب أختك".

واختتم حديثه: "بقينا بننسى إننا أهل وأسر وأصحاب وأخوات وممكن نتعاتب لكن مش ممكن نطلع نفضح بعض ونكتب كلام مالوش معنى، مليون خسارة على الرجولة واللي حصل ده مش رجولة أصلا".

وكان وائل شقيق الفنانة ياسمين عبد العزيز قد هاجم شقيقته الفنانة الكبيرة ياسمين عبد العزيز، أمس، عبر حسابه الشخصي على موقع التواصل الاجتماعي "فيس بوك"، قائلًا: "بصى يا ياسمين يا عبد العزيز يا أختى، أنا معاكى وفى ضهرك من وأنتِ صغيرة شيلت مشاكل كتيًر بسببك من وأنتِ عيلة صغيرة، بداية من مشاكلك مع الشاعر وبرادة وأنت عارفة إن أنا أتاذيت فيها إزاى وقضية الشغالات مؤخرًا غير قضية الضرب اللى كانت بينك وبين بنت هشام سليم الممثلة إللي لبستيها التورتة فى وشها".

وتابع: "وقفت جمبك بكل ما أملك من قوة أدافع عنك فى كل موقف صعب مر عليكى ونسيت حياتى ونفسى عشانك وبقى كل همى أنا ووالدتك، إنك تكبرى وتبقى نجمة فى مجالك، سيبنالك اختياراتك كلها لنفسك ووفقنالك على معظم قراراتك وكنت الوحيد اللى ساندتك ووقفت جنبك فى طلاقك، لكن هنهرتل وتروحى تعرفى واحد أصغر منك بـ10 سنين لا من سنك وتتصورى صور مالهاش أى لازمة على حساب سمعتك وسمعتنا، لا ومحدش هيسمح، من امتى واحنا بنعمل أعياد ميلاد وتنزل على السوشيال ميديا، من امتى الناس بتجيب فى سيرتنا؟ ونقعد نتعاكس على السوشيال ميديا؟".

ومع ذلك حياتك وانتى حرة فيها، أنا هتكلم على الشق اللى يخصني، انتِ مقاطعة كل العيلة عشان تعملي اللى على مزاجك، احنا دلواقتى وعايزين نفهم العلاقة دى ايه ورايحة على فين".

واختتم وائل حديثه: "أما بالنسبة للأخ الى ماشى وراكى فى كل حته وشايفك البيضة الدهب الى هتفقسله كل يوم احب أقولك يا راجل لما تيجى تدخل بيت تدخله من بابه يا راجل !! وتقعد مع رجاله البيت !!، دى الأصول وده الاحترام .. وطبعا لانك عارف انك مرفوض رافضا باتا فا عمرك ما هتعمل ده ومعندكش غير طريق الشمال الى انت سالكه من سنين مع بنات الناس !!، أنا من راى كفايه عليك البطوله الى أخدتها والعربيه المرسيدس الهدية، وتركز فى شغلك وتسيبنا فى حالنا لان طول عمرنا فى حالنا ومحدش سامع عننا حاجه وملوش لازمة جو الصور والمعاكسات ده وانا مبخفش من تهديد حد".

وبعدها بساعات، قام الفنان أحمد العوضي بالاعتراف رسميًا بحبه لياسمين عبد العزيز، قائلًا: "بحبك يا ياسمين"، ولتقوم هي أيضًا بالرد أمام الجميع كاشفة عن حبها، قائلة: "بحبك يا أحمد"، ونشرا صورة تجمعهما معًا.

يذكر أن خبر ارتباط أحمد العوضي بياسمين عبد العزيز كان قد انتشر بعد نشره لعدد من الصور في عيد ميلادها الـ40، عبر حسابه على موقع "إنستجرام"، وعلق قائلًا: "عيد ميلاد سعيد يا ياسمين" ووضع قلوب حمراء، وظهر الثنائي في الصور بحميمية جعلت الجمهور يتساءل عن طبيعة العلاقة بينهما ووجود قصة حب تجمعهما من عدمه.

ولم ينفي بعدها أي من الثنائي الشائعات المتداولة حول ارتباطهما، وعلق العوضي على الأمر في إحدى التصريحات الصحفية: "لن أؤكد أو أنفي هذا الموضوع، وأتمنى ألا يتحدث أحد بلساني أو تنشر تصريحات لم أقلها".

وكان الفنان أحمد العوضي قد تحدث من قبل عن مواصفات فتاة أحلامه المطابقة لمواصفات ياسمين عبد العزيز، كما نشر من قبل صورة للممثلة البريطانية كاثرين زيتا جونز، قريبة الشبه في الملامح مع الفنانة المصرية، عبر حسابه الشخصي على موقع "إنستجرام" وعلق قائلًا: "هذا هو ذوقي".

وفي أحد لقاءات الفنان أحمد العوضي التلفزيونية، تهرب من الإجابة على سؤاله حول ارتباطه بالفنانة ياسمين عبد العزيز، ولم يوافق على الإجابة بالنفي أو الإيجاب، واكتفى بالحديث عن مواصفات فتاة أحلامه، القريبة من صفات الفنانة ياسمين عبد العزيز.

موضوعات متعلقة:

شاهد بالصور جمال الزوجة الأولى للفنان الراحل محمود عبد العزيز وأم أولاده

كريم محمود عبد العزيز يرزق بطفلته الثالثة تعرف على سبب تسميتها بهذا الاسم

شقيق ياسمين عبد العزيز يكشف تفاصيل جديدة عن علاقتها بأحمد العوضي ازاي عايشين مع بعض في بيت واحد!

منى فاروق تدفع شقيق ياسمين عبد العزيز للاعتذار لها أمام الجميع ما الحكاية؟