للتحرش 5 أنواع.. اعرفيها واتعلمي طرق للدفاع عن نفسك
بواسطه شيماء عبدالشافي الخميس , 19 أكتوبر 2017 ,10:01 ص
.png)
كلنا بنطالب بحريتنا وبمساحتنا الشخصية وبندورعليها في كل مكان، لأن حريتنا جزء اساسي من ثقتنا بنفسنا وراحتنا النفسية واحساسنا بالامان، طيب لما ابسط جزء من حريتك الشخصية اللي هو "جسمك" تحسي ان حد بيشاركك فيه بالاكراه وبينتهك حق من حقوقك الاساسية و الشخصية، بيسرق حاجات مش ملكه زي نظره، كلمة، لمسة. احنا بنحاول نوصل لحريتنا في الحياة رغم اننا مش عارفين ناخد حقنا في "جسمنا" الخاص بينا.
ومن خلال دراسات دولية لحقوق المرأة في سنة 2017، كانت مصر وخاصه العاصمة القاهرة، اكثر مدينة خطورة علي الستات، وكمان كشفت الدراسة من خلال استطلاع للرأي ان معاملة المرأة في القاهرة بقت سيئة منذ بداية سنة 2011.
بحسب بحث أجرته الأمم المتحدة على الفتيات والستات فى المحافظات المصرية، كشفت فيه زيادة نسبة التحرش بمصر بصورة غير متوقعة او مسبوقة، وكانت اجابة 99.3% من السيدات والفتيات انهم اتعرضوا لنوع من أنواع التحرش الـ13 التي حددتها الهيئة.
وجدنا عدم استيعاب بعض النساء لبعض انواع التحرش، بعد ان شرحوا لهم طرق التحرش الـ13 التي اقرتها الأمم المتحده ليتفاجئوا بأنهم كانوا عرضة للتحرش.
واشارت الدراسة إلى ان اشهر انواع التحرش كان الجسدى عن طريق اللمس، حيث عانى 59.9 % من النساء إلى هذا النوع، واحتل في المرتبة الثانية التصفير والمعاكسات الكلامية حيث عانى منها 54.5% من النساء والفتيات، وبتعتبر اكتر انواع التحرش اللي بنواجهها في الاماكن العامة، المواصلات، الشغل.
انواع التحرش:
1- التحرش اللفظي:
ممكن يكون تصفير او تعليقات جنسية، معاكسات كلامية و الفاظ خارجة، نكات سيئة او دعابة عن الجنس او النساء بشكل عام، معاكسات تليفونية.
2-التحرش الجسدي:
اللمس والاحتكاك، والاغتصاب.
3- التحرش الالكتروني:
عن طريق الانترنت بنشر صور جنسية او تعليقات سخيفة او بالكلام الخارج او محاولة ابتزازك بأكتر من طريقة .
4- التحرش بالنظرات:
النظرات الحادة وتعبيرات الوجه والايحاءات.
التحرش كمان مش بس بنظره اعجاب ممكن كمان النظرة تكون علشان الاختلاف "اختلاف العرق والجنسية واللون" .
5- التحرش في المعاملات
خاصه في الشغل زي الاكراه على النشاط الجنسي او اي سلوك اخر مرتبط بالجنس عن طريق التهديد بالعقاب او التقييم السلبي، وحجب الترقيات، والتهديد بالرفد او التماس النشاط الجنسي من خلال الوعد بالمكافأة.
وممكن يكون كمان زي المطالبة بالتوصيل للبيت او الشغل اوالإصرار على الدعوة لتناول الاكل او الشرب.
ازاى تدافعي عن نفسك ضد التحرش ؟
1- لازم تأخدي بالك كويس في الشارع وتركزي علشان لو حسيتي بحاجة تبدأى تتصرفي صح.
2- اوعي تخلقي الاعذار للمتحرش لان في علامات واضحة جدا تعرفك اللي قدامك ده بيعمل ايه و ايه هدفه بالظبط.
3- ابدأي واجهي بلاش تخافي،علشان من المعروف ان المتحرش جبان، خدى موقف وزعقي و حاولي تركزي على تعبيرات وشك ونبرات الصوت .
4- لازم تكوني عارفة تمارين للدفاع عن النفس زي انك تضربيه ركله اماميه وبكده تشلي حركته تماما، لو مش عارفه تعملي دا فممكن تستخدمي "دبوس او مسمار او اي اداة حادة " تدافعي بيها عن نفسك وممكن كمان تستخدمي اي اسبراي للدفاع عن النفس رشيه باتجاه عينه .
الاسبراي ممكن يتعمل في البيت " ميه بصل - شطة – فلفل اسود ".
الاسبراي ممكن يتعمل في البيت " ميه بصل - شطة – فلفل اسود ".
5- حاولي تصوريه او تجعلي في شهود باللي حصل عشان تعرفي تعملي محضر له.
6- مواقع التواصل الاجتماعي من اكتر الاماكن اللي ممكن تنزلي عليه اللي حصلك وتنزلي صورته و تفضيحه.
اهم حاجة بلاش تخافي او تسكتي علي ابسط حق من حقوق، خليكي قوية وعندك ثقة بنفسك، واجهي لانك لو سكتي هتعيشي طول عمرك سلبية وجبانة وخايفة.
اهم حاجة بلاش تخافي او تسكتي علي ابسط حق من حقوق، خليكي قوية وعندك ثقة بنفسك، واجهي لانك لو سكتي هتعيشي طول عمرك سلبية وجبانة وخايفة.
خدى فكره
