أول تعليق من حسام حبيب بعد أخبار ارتباطه ببلوجر أردنية: نفي وغضب وتصريحات نارية

خرج الفنان حسام حبيب في أول تعليق له بعد تداول أخبار عن ارتباطه ببلوجر أردنية وخطوبته بشكل رسمي، لينفي تمامًا صحة هذه الأنباء، مؤكدًا أن الأمور لم تصل إلى مرحلة الخطوبة إطلاقًا.

أول تعليق من حسام حبيب بعد أخبار ارتباطه ببلوجر أردنية

قال حسام حبيب، في تصريحاته لبرنامج ET بالعربي: "الموضوع ما وصلش خالص للخطوبة نهائيًا، هما سبقوا الأحداث وخلّوا الموضوع يتعقّد بدل ما يحصل فيه خير."

وأعرب عن استغرابه من سرعة انتشار الأخبار قائلًا: "مش عارف أقولهم إيه بصراحة، الحاجة اللي بيتكلموا عنها عمرها ما وصلت لربع اللي بيتقال."

وأضاف حسام حبيب بنبرة متأثرة: "مش عارف الناس عايزين إيه مني بجد، على طول الناس بتخربلي حياتي." وأوضح أن ما تم تداوله أضر بالعلاقة حتى إن كانت في بدايتها، وقال: "إن كان في حاجة، هما كده بوّظوها، لأن أهل البنت ليهم عاداتهم وتقاليدهم، وناس محترمين جدًا جدًا."

وقد أشار حبيب إلى أن البعض يروجون لفكرة أنه يبحث عن التريند، معبرًا عن انزعاجه الشديد من ذلك: "يعني مش عارف الناس بقت بتتكلم في أي حاجة لمجرد التريند وتحقيق المشاهدات بس، وييجوا يقولوا: حسام هو اللي بيدوّر على اللقطة.. فين اللقطة اللي بدوّر عليها؟ إنتو اللي بتدوروا ورايا أهو."

مناشدة بعدم التدخل في حياته الشخصية

طالب الفنان الجمهور ووسائل الإعلام بتركه يعيش حياته بعيدًا عن الأضواء المبالغ فيها، وقال: "ابعدوا عن حياتي بقى، أنا مش عارف إيه ده! إمتى هتسيبوا الناس في حالها؟ عمرنا ما اتكلمنا عن مين خَطَب ومين اتجوز، ولو حصل، بيتكلموا بعد الأحداث."

وتابع: "دلوقتي بيتكلموا عن بنت وليها عائلة كبيرة، وبقى كل همنا التريند والفيديو ده يجيب كام؟".

توضيح موقفه من الجمهور والتصريحات الإعلامية

أكد حبيب أنه لم يصرّح لأي جهة إعلامية مؤخرًا، وأن كل ما يُنسب إليه غير صحيح، مشيرًا إلى أنه في حوار سابق مع الإعلامية بسمة وهبة عبّر عن عدم اهتمامه بالتريند، وقال: "أنا مش عايز حد يتكلم عني، ولا الناس كلها تتكلم عني، أنا طلعت مع بسمة وهبة وقلت إن الجمهور بقى آخر همي، عشان أوصل رسالة إني مش عايز تريند."

وأضاف بنبرة غاضبة: "كل شوية يطلعوا يقولوا إن حسام حبيب صرّح، أنا صرّحت فين؟ أنا ما قلتش حاجة لحد نهائي!"

في ختام تصريحاته، أعلن حسام حبيب عزمه اتخاذ إجراءات قانونية ضد من نسبوا له تصريحات كاذبة: "أنا هشوف مين اللي كتب الكلام ده على لساني وهحبسه، لأني ما قلتش لأي حد، وأنا هكبر المشكلة."

وأكد احترامه الشديد لعائلة الفتاة قائلاً: "البنت دي بنت ناس كبيرة أوي في الأردن، فهندخل القضايا ونشوف بقى!"

والجدير بالذكر أن حسام حبيب كان قد كشف مؤخرًا عن دخوله في علاقة عاطفية جديدة بعد انفصاله عن الفنانة شيرين عبد الوهاب، مما فاجأ جمهوره. وأوضح أن الفتاة ليست مصرية، وأنه بصدد تحديد موعد الخطوبة، لكنه لم يفصح عن أي تفاصيل أخرى.