في أول رد من ريهام سعيد على التكذيب والمتاجرة بمرضها: سفالة وقلة ذوق وقلة رحمة

خرجت الإعلامية ريهام سعيد عن صمتها، بعد الكثير من الأحاديث التي روجت لكذب مرضها، والمتاجرة بذلك، لكسب تعاطف الجميع، وذلك بعدما نشرت صورة لها موضحة أنها شُفيت من مرضها بمعجزة، وأن الطبيب الخاص سمح لها بممارسة حياتها الطبيعية والعودة إلى العمل مرة أخرى.

فقد نشرت الإعلامية ريهام سعيد مقطع فيديو، عبر حسابها الشخصى على "إنستجرام"، وردت فيه على كل الذين يتهمونها بالمتاجرة بمرضها، تحت عنوان: "المريض اللى بيتهمني اني بتاجر بمرضي والحقير اللى مش عاوزني أخف.. دي رسالتي ليكم".

وقالت ريهام سعيد من خلال مقطع الفيديو: "أنا شيفاها سفالة وقلة ذوق وقلة رحمة، هل أنا هقعد حابسة نفسى فى البيت شهر علشان أمثل إنى تعبانة؟، هل أنا لميت تبرعات على مرضي؟ هل لما تعاطفت معايا مرتبى زاد؟ أنا ست كويسة غصب عنك، ربنا بيبتلينى علشان بيحبى، أنا مطلعتش أعيط للناس وأعمل فيديوهات وأقول الحقونى، على فكرة أنا بقالى 3 شهور عيانة ومقولتش لحد، دايما قوية وعمرى ما تاجرت بحاجة".

وأكملت حديثها: "أنا مبحبش أصعب على حد ومبحبش حد يتعاطف معايا، وأنا ست قوية جدا بإيمانى بالناس اللى هتقف معايا، أنا عملت خير كتير جدا فى حياتى وواثقة إن ربنا هيطلعني من أى حاجة وحشة، هو أنا أصلا كنت محتاجة تجميل فى مناخيري؟ ولا محتاجة تجميل فى أي حاجة؟، وحتى لو عملت عملية تجميل أنت مالك، دى حرية شخصية، أنت مالك، أنا تعبت وكنت بموت زي أي واحد، للناس المريضة دي، على فكرة مبيكذبش غير الكذاب ومبيخونش غير الخاينين، يعني شريف مدكور لما كان بيستقبل الناس فى بيته يبقي كدا هو مكنش عنده كانسر؟ كان بيمثل؟ هل هو الواحد لازم يموت علشان ميكنش بيمثل، هل لازم يكون خبر وفاتي انهاردة علشان تقول إنها مش بتكذب".

واختتمت كلامها، قائلة: "انا كنت عيانة وخفيت وراجعة أحسن وأقوى من الأول وراجعة برنامجى وهيبقي أحسن من الاول، بإذن الله بإذن الله، يوم الحد هتبقوا مكسوفين أوي علشان كنت مصورة كل الى حصل، أد إيه هى حاجة قذرة انك تثبت للناس انك كنت بتموت، انا قلت لما أموت ادعولى مش اتعاطفوا معايا، انا مش عايزة أصعب على حد أنا طلبت الدعاء بس، الدكتور لما تشوفوه هيقولك اللى حصل دا معجزة، كان علطول يقولى أنت محتاجة معجزة، لو مستكتر عليا إن أنا أخف دي مشكلتك، لو مستكتر عليا ان انا ارجع شغلي واعيش حياتي، وكنت عاوز خبر وفاتي للأسف دا مش وقتي".

وكانت ريهام سعيد قد نشرت صورة لها عبر حسابها على موقع إنستجرام، وأوضحت عودتها إلى عملها مرة أخرى بأمر الطبيب، قائلة: "الدكتور سمح لي بالعودة لحياتي الطبيعية، وبيقول لي ده حصل معجزة، المعجزة دي حصلت بدعاءكم، بجد شكرا، للتوضيح الدكتور سمح لي بالحركة لأن ابتدا يظهر أعراض اكتئاب شديد ومحطوطة تحت الملاحظة ٣ شهور".

وقد نشرت صورة أخرى، أخبرت الجميع عن موعد عودتها على شاشة التليفزيون، من خلال برنامجها صبايا، قائلة: "مش مصدقة إني راجعة شغلي، صحيح من غير ودان ونص مناخير بس ألف حمد وشكر، صبايا الأحد القادم على قناه الحياة، وحشتوني".

موضوعات متعلقة:

ريهام سعيد تنشر صورة لها وهي ترقص وتغلق التعليقات لعدم الرد

رد ناري لريهام سعيد على جورج قرداحي بعد تصريحه تضرب بالجزمة

ريهام سعيد تجمع تبرعات وتطلب إنقاذ حياة هذا الفنان

ريهام سعيد مع أولادها وزوجها في أول ظهور رسمي

أول ظهور لريهام سعيد بعد مرضها الخطير هل تغير شكلها؟