زوجة خالد عليش تفضح أفعاله بعد الانفصال: خاني وضربني وخد فلوسي وهددني برفع قضية آداب ضدي

أعلنت الفنانة ميما الشامي، زوجة الفنان الكوميدي ومذيع الراديو خالد عليش، عن تفاصيل انفصاله عنها وتعرضها للخيانة والضرب والاستيلاء على أموالها، ومن ثم طلاقهما منذ عدة أشهر، مشيرًة إلى تفاصيل شخصية مُسيئة لخالد عليش، وذلك عبر حسابها الشخصي على موقع التواصل الاجتماعي "فيس بوك".

واضطرت الفنانة ميما الشامي إلى اللجوء إلى السوشيال ميديا بعد نفاذ صبرها وطاقتها ولم تستطع الوصول إلى حل للأزمة معه، وكتبت عبر حسابها الشخصي على "فيس بوك"، قائلة: "خالد عليش في الكنافة .. هو ٤٠٠٠ جنية في الشهر يكفى بنت في مدرسة إنترناشونال وباباها بيقبض ٧٥٠٠٠ في الشهر، ده غير الإعلانات والإيفنتات وإعلانات السوشيال ميديا، وطبعا انا اللي كنت بتفق عالفلوس دي فعارفة من سنة هو كان بياخد كام".

وأوضحت ميما أن "عليش" هددها برفع قضية "آداب" عليها لتشويه سمعتها، وأكدت تعرضها للخيانة والضرب، وأكملت حديثها: "والله في سهرة من السهرات اللي بينزلها وليدفع فيها دة يكفي بنته، لإن هو اللي خاني وضربني وكنت أنا اللي يعتذر عشان أنا اللي قصرت وهو محترم ومؤدب مع كل الناس إلا أنا فأنا اللي مش كويسة (طبعا هو كان بيقنعني بالكلام ده هو واهله فأنا كنت بصدق لأنه حولني لشخص عديم الثقة في نفسه، فكنت بحس إني أنا استاهل اتضرب واتهان واتخان وانا اللي مقصرة)".

وتابعت: "واخد فلوسي.. الراجل مش معترض على فلوسي ومعترف بيها بس مش هيدهالي غير لما أوافق على كل شروطه يإما الجائي للقضاء وانا كده كده بشتغل مع المخابرات العامة و... (لفظ خارج)"، ثم أوضحت أنه من طلقها لأنه لم يعد يحبها مثل السابق.

وبعد محاولات المتابعين بإقناعها بحذف المنشور وحل الأزمة وديًا، قامت بتعديل المنشور قائلة: "ونبي الناس اللي بتكلمني عشان أشيل البوست انتوا متعرفوش انا مستحملة إيه أنا وبنتي ومتعرفوش أنا عملت مع الراجل ده إيه ومتعرفوش أنا ساكتة بقالي قد إيه.. ومتعرفوش انا ببيع اية عشان بنتي لان اخر ٨٠٠٠ جنيه كانوا معايا هو اخدهم، ومتعرفوش انا اتهنت ازاي منه ومن أهله ومن صحباته البنات.. فالبوست دة اخر حل عندي لان مكنتش عايزة اعمل كدة مش عشاني ولا عشانه احنا بنا ربنا وهيحكم بنا بس بنتي مكنتش تستاهل كده فسامحيني يا ميما بس غصب عني وميما الحمد الله فهمت كل حاجة بدري لانها شافت اخر موقف قدام عنيها".

ثم أضافت تعديل آخر على المنشور لتثبت حقيقة ما تقوله: "أنا معايا صور لكل حاجة قلتها في البوست ده بس مش هعمل كده عشان أنا اتربيت إن مفصحش حد كان فيه بيني وبينه عيش وملح، أنا كتبت الكلام ده لأن مش قدامي حل وزهقت من كتر التمثيل إني أنا اللي قوية وتمام وهو محترم ربنا يباركله في كل فلوس وأملاكه اللي كان بيشتريها وانا كنت بتكدر في الفلوس عشانه هو بس، أنا مش عايزة غير حق بنتي الصغيرة ومش هتنازل عنه لأن في اول الموضوع وافقت بكل شروطه عشان اللي كان بينا واتحملت كل التريقة عليًا وعلى أهلي وتعب أبويا بس محصلش أي حاجة".

ثم تابعت "ميما" في تعديل آخر للمنشور: "أمي جالها الكانسر والناس كلها اتحايلت عليه يوقف جنب مراته، قالولي احنا عارفين إن أمك تعبانة من زمان معرفش عرفوا منين واحنا عرفنا بعض ما كل الاتصالات اتقطعت بنا وبين بعض، بعتله لو سمحت عايزة فلوسي من فضلك انا ببيع ذهب ابويا قالي مليش دعوة أنت بتبيعي وبرضه الفلوس مش مكفياه !!!".

ثم ردت "ميما" على المتابعين الذين نصحوها باللجوء إلى القضاء: "الناس اللي بتقولي ارفعي قضية، أنا قاعدة ٦ شهور مش راضية أعمل ده عشان اللي كان بينا وعشان البنت ومكنش أهلي حتى يعرفوا تفاصيل لحد ما هو كلم أهلي وقال الجؤوا للقضاء ومش هتعرفوا توصلوا لحاجة، أنا بشتغل مع المخابرات العامة وبقبض منهم ومش هتعرفي تجيبي ورقة حتى بـ ١٠ ىلاف جنيه".

وتابعت: "أنا فضلت محافظة على اللي كان بينا وساكتة بس هو مفيش فايدة جبروت وغرور وافترا وأول ما اخد فلوس الإعلانات بدل ما يرجعلي فلوسي إللي مكنش ليها علاقة بالانفصال راح جهز شقة كنا شارينها مع بعض وقعد فيها واشترا شالية في الساحل بـ ٢ مليون طيب وفلوسي !!!! انا كنت مدياله ٢٣٠ الف من غير اي ضمانات لما راح اشترى العربية المرسيدس وفي المقابل خدت عربيته القديمة اللي لسة بإسمه وماشية بيها برخص منتهية، اللي نزلت الصبح من بيتي انا وبنتي ملقناش العربية وأخدها وقال انا ليا فلوس فيها عايز حاجة تضمن حقي ورجعها لما بنته كانت في المستشفى تكرم منه كده مش حق".

واختتمت حديثها: "بيتصدق عليًا بفلوسي، هو دلوقتي عايزني أديله ٧٠ الف وكان في الاول عايز ١٠٠ الف عشان يسيبلي العربية، طيب انا مش عايزة العربية انا عايزة فلوسي، لا مش معايا كاش".

والجدير بالذكر، أن الإعلامي والفنان الكوميدي خالد عليش كان قد تزوج من ميما الشامي في ديسمبر 2013، وأنجبا طفلة، وقد انفصلا في نهاية العام الماضي، بعد زواج استمر 6 سنوات.

ويذكر أن خالد عليش، هو مذيع راديو شهير وقدم عدة برامج "معاك في السكة" و"الموقف"، وغيرهما، وحقق نجاحًا كبيرًا، ثم اتجه إلى التمثيل من خلال المشاركة في بعض المسلسلات، منها مسلسل "مأمون وشركاه"، أما ميما الشامي فأصبحت فاتجهت أيضًا للتمثيل منذ وقت قريب من خلال مشاركتها بأدوار صغيرة في بعض المسلسلات، منها الجزء الثاني من مسلسل "أبو العروسة"، ومسلسل "بنات سوبر مان"، وغيرها.

موضوعات متعلقة:

خالد عليش يعيش قصة حب ويعلن قرب خطوبته بعد فترة من طلاقه ما الحكاية؟