ليه طارق حلمي ممكن يبقى فتى احلامك

لعب النجم آسر ياسين السنة دي في مسلسل 30 يوم دور الدكتور طارق حلمي طبيب الأمراض النفسية، ورغم ان الشخصية ليها غلطات كبيرة زي انه اتجوز على مراته من غير علمها الا انه ممكن ببساطة يبقى فتى أحلام بنات كتير، عايزة تعرفي ليه؟ لهلوبة جيبالك الاسباب:

- دكتور نفساني:

مين يقدر يعرف البنت عايزة ايه ويحتويها اكتر من دكتور نفساني؟! دي اول حاجة ممكن تخلي طارق شخص يلفت نظر البنات.

- صاحب جدع:

طارق عنده مجموعة من الاصدقاء اللي كلهم مستعدين يقفوا معاه ويساعدوه حتى لو حياتهم في خطر بسببه، لكن مفيش حاجة بعدتهم عنه.

- أخ عاقل:

اخته قالت عنه انه مش مجرد اخ، وانها بتعتبره أبوها، طارق بيحاول طول المسلسل يبقى سند وحماية لاخواته ومامته حتى رغم الظروف اللي هو فيها والتجارب الصعبة اللي بيمر بيها في الـ 30 يوم.

- زوج محب:

زوج ذكي كمان لأنه مش مع اول مرة طلبت منه مراته الطلاق وافق، بالعكس فضل باقي عليها وبيحاول يصالحها رغم كل حاجة، وفي نفس الوقت مقصرش مع مراته التانية، وكان بيعمل توازن بين الجبهتين، وحبه فضل بنفس القدر للاتنين، طبعا فكرة الزوجة التانية مش كل الناس تقبلها، لكن لازم نعترف ان طارق عرف يكسب مراته الأولى تاني.

- بيتحكم في اعصابه:

طول الشهر وطارق بيطلع من تجربة قاسية لتجربة أسوأ ومع كده بيحاول يمسك اعصابه على قد ما يقدر وياخد ادوية مهدئة علشان يفضل متحكم في اعصابه ويحتوي اللي حواليه. 

- مصدر أمان:

رغم ان طارق اكتر واحد في خطر لكن هو مصدر امان لكل اللي حواليه وكمان موجود ومساعد لاي حد واقع في مشكلة.

- أب كويس:

طارق كان نفسه يبقى أب واول ما جاتله البنت اهتم بتربيتها جدا واعتبرها رقم 1 في حياته.