شيرين رضا لـ فتاة المول: "أنا آسفة"

بلهجة حزينة، وجهت الفنانة شيرين رضا رسالة إلى "سُمية" التي تم التحرش بها من قبل في أحد المولات واشتهرت بعدها  بـ"فتاة المول"، ومؤخرًا تم الاعتداء عليها من الشخص نفسه بآداة حادة سببت ليها جرح عميق في وشها.

بدأت شيرين رضا رسالتها بقول: "أنا آسفة.. آسفة ليكي ولكل حد شاف الصورة دي.. آسفة ان في واحد متحرش اتسجن أسبوعين بس وطلع بعد ما دفع غرامة 100 جنيه وخرج علشان يوصلها انها تبقى مرمية في مستشفى وعندها جرح زي ده هيفضل طول عمره في وشها"، وطالبت بتدخل القانون في الأمر وتعديل القوانين الخاصة بالتحرش، وتابعت: "ولا احنا مش المفروض نمشي بسلام في الشارع؟!".

وعلقت شيرين رضا على الموضوع في برنامج "هنا العاصمة"، لما تم فتح ملف الواقعة مرة تانية، خصوصًا بعد ما الشخص اللي تحرش بـ "سمية" اعتدى عليها وحاول "دبحها" على حسب قولها، وتسبب ليها في جرح عميق في الوجه اتنقلت بسببه للمستشفى، واجرت عملية جراحية واحدة، ولازلت في انتظار اجراء اتنين غيرها، بالاضافة لعملية تجميلية.

وتفاعل جمهور مواقع التواصل الاجتماعي مع حادثة التحرش، بتدشين هاشتاج "أنا_أيضا" أو "#Metoo"، واللي كتير من البنات حكوا في حوادث مشابهة تعرضوا ليها، باختلاف سنهم او شكل ملابسهم. كل ده حصل بالاضافة لظهور اول استطلاع دولي لاراء الخبراء حول حظوظ النساء في المدن اللي سكانها اكتر من 10 مليون واللي نشرته وكالة الأنباء رويترز وقال ان القاهرة تعد الاكثر خطورة على الستات عالميًا وتحتل المركز الاول.