كل حاجة وعكسها.. اشهر الكدبات المصرية
بواسطه شيماء عبدالشافي الخميس , 26 أكتوبر 2017 ,3:52 م
.png)
في مجموعة جمل بتميزنا كمصريين بنقولها دايما في مواقفنا وحكايتنا واغلب كلامنا، وفي الغالب بنسمع الكلمة ومع الوقت بنكتشف عكسها، بس انت بتبقى مصدق اللي بيتقال، ومش بتعرف انه كلام غير حقيقي الا لما تدبس، علشان كده لهلوبة جمعتلك الكدبة وحقيقتها:
1- الكدبة: "حبيبي على نياته كل البنات اخواته":
الحقيقة: طبعا احنا كبنات بنبقي مصدقين اننا ماليين عين اللي بنحبه واننا زي ما بيقول "حب عمره اللي فات واللي جاي و اغلى حاجة في حياته" بس طبعا هو بيكون عنده اكتفاء من كل نوع بداية من "زميلتي للبيست فريند و البيستي لـ ماي وان اند اونلي فور ايفر".
2- الكدبة: "بص يابني احنا بنشتري راجل، ومسألة الماديات دي مش مهمة خالص"
الحقيقة: الجوازة في الاخر ممكن تبوظ علي شكل الستاير مثلاً او على لون شباشب الحمام.
3- الكدبة: "البنت بتضعف وتتكسر لما بتفركش" .
الحقيقة: انها بتحلو اكتر من الاول ولحد دلوقتي مش عارفين السبب هل عشان تندمك مثلاً ولا انت كنت منكد عليها، ولا ليه بالظبط بس دي نقطة اختلفوا العلماء عليها.
4- الكدبة: "بكره الفلوس تجري في ايديك زي الرز".
الحقيقة: ان اللي بيحصل عكس كده خالص، لان بكره ده الاسعار بتزيد فيه والفلوس اللي في ايدك بتقل وبتفضل تجري وراها بس مع الاسف بتطير
5- الكدبة: "بعملها save وابقى اقرأها بعدين".
الحقيقة: مش عارفة ليه بعدين ده مش بيجي علينا، والحاجات اللي بنحفظها بتكتر لحد ما في يوم تبلعنا كلنا.
6- الكدبة: "اتخرج عشان ترتاح، اتعب النهاردة وارتاح بكره".
الحقيقة: احنا في الكلية بنكون في عنق الزجاجة بس لما بنتخرج بنتحشر في الزجاجة ذات نفسها وادينا قاعدين مش عارفين نخرج.
7- الكدبة: "الزمالك قادم":
الحقيقة: سنظل اوفياء طول العمر تقريبًا ولا ايه ..ربنا يستر.
8- الكدبة: "انا داخل عليك اهو، 5 دقايق و اكون قدامك".
الحقيقة: انك بتكون لسه صاحي اصلاً ومش غريب انك تكون لسه كمان على السرير.
9- الكدبة: "قلب الانثى قطة":
الحقيقة: هي قطة فعلاً بس بتخربش وبتجرح كمان لو حبت تعمل دا، وبتتحول في ثانية لأسد.
10- الكدبة: "انت مش عارف انت عندي ايه يابني.. انا بحبك جدًا "
الحقيقة: ان الكلمة اللي وراها بتبقي بس زي اخويا.. اوعى تستعجل لانك في الآخر بتتحط في منطقة الفريندزون واللي انت في كل الاحوال بتروحلها.
12- الكدبة: لما ترد على حد متصل بيك "والله كنت لسه هكلمك حالاً"
الحقيقة: انت بتكون في الغالب مسقطه او مش فاكره من الاساس بس بنداري الموقف بالكلمتين دول.
13- الكدبة: "مفيش غيرك تملى عيني ،ومفيش غيرك في حياتي "
الحقيقة: ان فعلاً مفيش غيرك في حياته + بنات كتير + شوية حاجات فوق بعض، والحاجة الوحيدة اللي ممكن تملى عينه هي رصاصة فيها علشان تبطل تبقى زايغة .
14- الكدبة: "لما تتجوزي اعملي كل اللي عايزاه ونفسك فيه":
الحقيقة: ان البنت بتتجوز من هنا، ومفيش شوية وتبقى حامل من هنا وبعدها تنضم لجروب الامهات على "فيسبوك"، ومش بتعمل حاجة من اللي كانت عايزاها بردوا.
15- الكدبة: احنا شعب متدين بطبعه.
الحقيقة: مع الاسف احنا ابعد ما يكون عن التدين، احنا شعب بنشتم و بنهين الدين في كل تصرفاتنا
تقريبًا احنا كل حاجة وعكسها بس ده عمره ما يمنع اننا شعب دم خفيف و ابن نكتة.
تقريبًا احنا كل حاجة وعكسها بس ده عمره ما يمنع اننا شعب دم خفيف و ابن نكتة.
موضوعات متعلقة:
خدى فكره
