فدوى عابد تكشف عن ارتدائها الحجاب لشهر.. "عشان يحميني من التحرش"

كشفت الفنانة فدوى عابد، خلال استضافتها في برنامج "الستات" مع الإعلاميتين مفيدة شيحة وسهير جودة، عن أنها ارتدت الحجاب مرة واحدة في حياتها منذ فترة، وكان لمدة شهر واحد فقط، ثم قررت خلعه مرة آخرى.

سر ارتداء فدوى عابد الحجاب لشهر

قالت فدوى عابد خلال حوارها في برنامج الستات، أنها قامت بارتداء الحجاب في فترة الجامعة، لحمايتها من التحرش، قائلة: "اتحجبت شهر وكانت تجربة في أيام الجامعة، لأني كنت غضبانة وكنت بقول يمكن أنا اللي غلطانة أن الرجالة بتبص لي بشكل معين، فقررت هلبس واسع وطويل يمكن ساعتها ما يشفونيش".

وتابعت: "قررت ألبسه كنوع من الحماية لحد ما كنت في الجامعة في عز الضهر في رمضان وكنت واقفة جنب كشك كلنا بنقف فيه، وواحد معدي مد إيده روحت قعدت في البيت أسبوع وبعدين قررت أني أخلعه وعرفت أن مش بيحوق فيهم".

واستكملت حديثها: "أنا كنت لابساه عن غير اقتناع لمجرد حماية، ولما خلعته قلت خلاص هشوف طريق تاني زي العنف، والموقف ده خلاني طول الوقت اقرأ الراجل أسرع ومش سهل اللي قدامي يتعدى حدوده معايا أو يتحرش بيا، وهما بيصطادوا اللي هيتحرشوا بيهم وبيكونوا عارفين اللي هيسكتوا".

قصص فدوى عابد مع التحرش

كشفت الفنانة فدوى عابد خلال حوارها في برنامج "الستات" عن تفاصيل تعرضها للتحرش أثناء فترة المراهقة، قائلة: "تجاربي مع التحرش كتيرة وبدأت وأنا مراهقة وأول مرة كانت في تاكسي وأنا في ثانوية عامة، وكنت خايفة بشكل رهيب وشكرت الراجل وإديته فلوس، وطلعت لماما منهارة".

وتابعت: "احتجت وقت طويل علشان أفهم إني مش لازم أسكت ولازم أفضح المتحرش، وإني مش غلطانة في حاجة".

واستكملت "عابد": "أظن الغضب هو السبب في أن اقوم بضرب المتحرش، وأنا مبسوطة إن جيلنا شجع أجيال بعدنا تتكلم عن التحرش وتطرح الموضوع للنقاش".

ومن ناحية آخرى، يذكر أن أخر أعمال الفنانة فدوى عابد كان من خلال مشاركتها في مسلسل "صوت وصورة" بطولة حنان مطاوع ونجلاء بدر ووليد فواز ومراد مكرم ونردين فرج، وغيرهم من النجوم، وقد حقق نجاحًا كبيرًا خلال الأيام الماضية، وكان يدور حول قضية التحرش وطريقة مواجهته.