أول تعليق من حسن شاكوش على مقلب رامز مع طليقته: بتأسف من الألفاظ المش كويسة حتى لو مش مني!

وقع مطرب المهرجانات حسن شاكوش وطليقته ريم طارق، ضمن ضحايا برنامج "رامز جاب من الآخر"، مع الفنان رامز جلال، المذاع عبر قناة ام بي سي مصر، أمس السبت.

وفور مشاهدة "ريم طارق" لطليقها في البرنامج، انتابها نوبة من البكاء والصراخ والسباب، ورفضت استكمال الحلقة، ليظهر بعدها حسن شاكوش، في بث مباشر عبر حسابه الشخصي على موقع الصور والفديوهات الشهير "إنستجرام"، ويعلق على حلقته مع طليقته في برنامج رامز جلال.

أول تعليق من حسن شاكوش على مقلب رامز مع طليقته

علق مطرب المهرجانات حسن شاكوش، عبر البث المباشر، على صفحته الرسمية على موقع الصور "إنستجرام"، وتأسف لجمهوره لعدم استكمال الحلقة كما هو كان مخطط لها، بسبب طليقته، قائلًا: "عايز أقول لجمهوري متزعلوش حقكم عليا كنت عايز أقدم ليكم أحسن حاجة وحلقة حلوة عشان إحنا في جو رمضان وعايز الناس تنبسط وقلت الناس تبقى مبسوطة بالحلقة، وقلت أنا عارف أني رايح لرامز بالرغم أي حاجة هتحصل بس قلت مش مهم المهم الناس تنبسط.

وتابع حسن شاكوش، موضحًا رغبته في استكمال مقلب رامز، قائلًا: "أنا اسف على اللى أنتم شفتوه في الحلقة عشان كمان الحلقة مكملتش ومحصلش نصيب، أنا كحسن شاكوش كنت عايز أكمل الحلقة لوحدي، لأن رامز نجم كبير ودي يعتبر 3 سنة أطلع مع رامز وهو محترم، وشكرًا لرامز أنه اختارني من ضمن النجوم اللى استضافهم في البرنامج، بقول لرامز متزعلش وحقك عليا أنا عارف أن كنت عايز تقدم أحلى حاجة لجمهورك".

واستكمل "شاكوش" كلامه، قائلًا: "بس ده يثبت للوطن العربي كله أنك أنت مش بتتفق مع نجم، وكنا ممكن عادي نكمل الحلقة بس أننا منكملش الحلقة في مصداقية أني مكنتش أعرف واتفاجئت أن في ضيف تاني، والحمدلله على كل حال وكل واحد مش بياخد أكتر من نصيبه".

واختتم "شاكوش" حديثًا، مُتأسفًا من أي ألفاظ خارجة تم سماعها خلال الحلقة، قائلًا: "وبتأسف لكل الناس اللى سمعت أي ألفاظ مش كويسة حتى لو مش مني، وإن شاء الله نتقابل رمضان اللي جاي".