مخرج يحذر من التعامل مع محمد سعد: "أنت المفروض كبير والكبير مابيلفش ويدور".. ما الحكاية؟

خرج المخرج أحمد البنداري عن صمته، وكتب منشورًا مطولًا، عبر حسابه الشخصي على موقع التواصل الاجتماعي "فيسبوك"، وانتقد من خلاله الفنان الكوميدي محمد سعد واتهمه بأنه لم يلتزم بكلامه معه في التحضير لفيلم "الدشاش"، وحذر أحمد البنداري المخرجين من التعامل مع الفنان محمد سعد، بسبب عدم إلتزامه وجديته واحترامه أثناء العمل.

مخرج يحذر من التعامل مع محمد سعد

فقد كتب المخرج أحمد البنداري، عبر حسابه على موقع "فيسبوك"، موضحًا سبب المشكلة التي وقعت مع الفنان محمد سعد، قائلًا: "فيلم الدشاش ده اصلا اسمه كعب داير و كان مترشحله نجوم تانية يا ريتني كنت روحت لأي حد فيهم.. المهم عن طريق صديق مشترك وديته لمحمد سعد تحت اسم "الحاوي" و كان سعد ترشيحي انا رغم تحذير ناس كتير من التعامل مع سعد كنت مصمم عليه و شايفه نقلة ليا و ليه».

وتابع أحمد البنداري: "المهم بعد ٣ شهور شغل عليه من اللف على المنتجين بالتوازي شغل على التصور البصري كله directors treatment و visual file و شكل الشخصيات واللبس والديكور وطريقة الإخراج والمونتاج والـ color pallet وستوري بورد كاملة علشان أروح للنجم بتصور كامل للفيلم مش رايحين نهزر يعني.. المهم بعد مكالمات ومواعيد كتير روحتلة البيت أنا والمؤلف (اللي مش بالوم عليه لأنه بقاله كتير مستني فرصة من نجم المفروض انه كبير)".

وأضاف قائلًا: "المهم.. المفروض السيناريو كان عاجب سعد جداً ومتحمسله جداً خصوصاً انه كوميدي دراما مش فارس كوميدي زي كل افلامه.. وكان في شركة كبيرة ومنتج كبير موافق على الفيلم بحذر طبعاً لسمعة محمد سعد مع المخرجين أنه لكني طمنته وقولتله ماتقلقش سعد عاجبه الفيلم ومتفقين على الخطوط العريضة كلها وكان شرط سعد الوحيد أن المنتج مايعترضش على أجره الكبير.. ده كان كلامه بالحرف".

وتابع "البنداري": "المهم المنتج ده كلم سعد واداله أكتر من ميعاد وسعد لغى كل المواعيد لأسباب مختلفة.. لحد ما في يوم كلم هو المنتج وقاله أن الفيلم مش عاجبه وأن السيناريو ضعيف وأنه عايز يبقى يحدد معاه ميعاد على فيلم تاني (لما نجم المفروض كبير يقول لمنتج أن الفيلم اللي بقالي شهور مجننه معايا فيه أنه فيلم ضعيف ووحش هو قتلي فرصي مع المنتج ده وقتها) المهم.. لما المنتج كلمني وقالي استغربت جدا لأن ده عكس كلامه ١٠٠٪؜".

واستطرد قائلًا: "المهم بعدها كلمتة قالي نفس الكلام انه الفيلم مش عاجبه ماحبتش اطول في المكالمة خصوصاً أن ده حقه أنه يعجبه فيلم أو ما يعجبوش مع أنه مقالش كده من الأول بالعكس والحمد لله على نعمة التكنولوجيا الواتساب كله موجود.. بس الغريب أني أكتشف بعد كدة أن الدشاش هو الحاوي مع مخرج تاني ومنتج تاني ليهم كل الإحترام و التقدير والتمنيات بالتوفيق.. مع الفارق في نجم كبير جدا مش هقول اسمه روحتله بفيلم.. شوفت منه صراحة ووضوح في اللي عاجبه واللي مش عاجبه وقاري الفيلم كويس مش حد قاري وحاكيله الفيلم ده غير التزام رهيب في المواعيد مع أنه حقيقي مش فاضي لحد آخر ٢٠٢٥ يعني ممكن مانشتغلش الفيلم ده أصلاً مع بعض لكن عرفني ليه الراجل ده محافظ على نجوميته بقاله ٢٠ سنة تقريباً لأنه بيسمع للأخر وبيقرأ كويس وملتزم لأقصى الحدود".

واختتم كلامه قائلًا: "ربنا يوفق الجميع وده كان تحذير لأي صانع أفلام من التعامل مع محمد سعد من غير ما يكون مأمن نفسه ومجهوده ١٠٠٪؜ لأن مجهودك والتزامك وصدقك دول شرفك في الشغلانة دي.. وهما اللي هيخلوك تعرف تحط صوابعك في عين التخين وتقوله كده غلط وعيب وما يصحش كده أنت المفروض كبير والكبير مابيلفش ويدور.. عموما انا بعد الموقف ده و موقف شبيه حصلي السنة اللي فاتت بدعي و بقول يا رب ٥ مليون دولار ونبطل شغل".