أحمد أمين يعلن عن تحسن حالته الصحية: هارجع اشتغل قريب جدًا بعد أسبوعين من غير كلام

أعلن الفنان أحمد أمين عن تحسن حالته الصحية، بعد إصابته بمرض فى الحنجرة أفقده الصوت لمدة أسبوعين دون كلام نهائيًا.

وقد طمأن "أمين" جمهوره على أخر ما وصلت إليه حالته الصحية وأنه سيعود للعمل قريبًا جدًا، وذلك عبر حسابه الشخصي على موقع التواصل الاجتماعي "فيس بوك"، قائلًا: "أنا الحمد لله بقيت أحسن كتير.. وهارجع اشتغل قريب جدًا.. وباخد دلوقتى جلسات voice therapy دى حاجة لطيفة جدًا، واكتشفت إنها ضرورية ومفيدة لكل اللى بيستخدم صوته كتير (ممثل – مغنى – مدرس)".

وأكمل "أمين" كلامه: "استفدت كتير جدًا من تجربة الصمت.. أسبوعين من غير كلام فرقوا معايا جدًا ذهنيًا.. وينفع يتكتب فيها كتب بس سريعًا كدة.. أولًا لقيت نفسي عايز أكتب زي زمان.. مش عشان عندى كبت.. لأ.. عشان المخزون بيزيد.. ما هو لما بتقلل وقت الإرسال وقت الاستقبال بيزيد.. أنا بقيت بسمع.. قريت كتير.. قريت حتى حاجات متعلقة عالحيطة فى المكتب والبيت من زمان قدام عيني وماكنتش قريتها.. وتقريبًا قربت اسمع الحاجات كمان.. قربت اسمع الزرعة اللى عندى فى المطبخ".

وأضاف: "كنت بتواصل مع الناس بالكتابة واحتفظت بشوية ورق منه لقيت الكلام ورا بعضه فى سياق مسخرة مش مفهوم بالمرة.. أما الورقة اللى كنت بكلم فيها مراتى لقيت فيها 3 جمل بس.. (ياااه...؟ / ما هى غلسة وتستاهل/ وحاضر يا حبيبتي) بس .. وبيتكرروا..كنت بشاور لأولادي.. وفهموني.. وما اضطريتش ازعق فى البيت.. والدنيا كانت ماشية.. معناه ان لو القانون ان بابا مش بيزعق هايترتب على القانون ده ان كلنا هانسمع الكلام من غير زعيق".

وتابع أحمد أمين: "الصمت محتاج صبر.. وعدم التعبير بالكلام محتاج بلاغة.. مش فى إنك تعرف تشاور.. لأ.. محتاج بلاغة فى اختيار الكلمة اللى هاتشاور بيها عشان تلخص كل كلامك والناس تفهم.. من العجائب مثلا انى أنا طلبت الأوردر فى الكافيه بالإشارة وجه مظبوط.. فيه بلاغة تانية فى الاستماع.. أنت ممكن تقول رأيك بتعبيرك وانت بتسمع.. ممكن تعطل أفكار اللى قدامك.. ممكن تشجعه.. وممكن توصل حاجات كتير بطريقة استماعك بس".

واستكمل حديثه: "اتفاجئت من الحاجات المشتركة بينى وبين ولادى وصحابى القريبين.. كانوا بيفهمونى بأقل الإشارات.. واتفاجئت إن ولادى مبسوطين جدا إنى بسمعهم بس.. من غير ما اقول حاجة.. فقررت إنى لازم أقضى وقت طويل بس بسمعهم.. اكتشفت انهم بس محتاجين كده.. مش عايزين معلوماتى العبقرية.. ولا آرائى فى الحياة.. ولا حلولى الإبداعية.. عايزيننى مهتم.. بس.. ومن ألطف الحاجات إنى لما كنت بشاور للناس كانت بتشاور لى حتى أصحابى اللى عارفين الموضوع.. حضرتك أنا بسمع.. أنا عندى مشكلة فى صوتى بس".

واختتم قائلًا: "من مصلحة أي إنسان إنه يسكت لأن التعبير المستمر السريع الغير محسوب عن أفكارك بيخليك مش لاحق تكون رأى متكامل وناضج.. أنا كنت بسمع حاجة وبسكت بلاقي رأيي بيتحسن تدريجيا.. وفى معظم الأحوال كنت بحس ان رأيى مالوش لازمة أوي.. بقول لك ايه.. اسكت أحسن".

والجدير بالذكر، أن الفنان أحمد أمين أعلن منذ وقت قريب عن إصابته بمرض في الحنجرة، أدى إلى فقدان صوته، وعدم تمكنه من استخدامه لمدة أسابيع، وكان من المحتمل خضوعه لعملية جراحية بها.

موضوعات متعلقة:

أحمد أمين ممنوع من الكلام لمدة 3 أسابيع اتفقت مع حد يزعق لولادي بدالي